US-in Myanmar sipai hnena ralthuam thawntu sumdawng hrek

United States chuan Myanmar sipai sorkar hnena Russia siam ralthuamte thawn ṭhina puh, Myanmar mi sumdawngte leh an company-te a hrek.

Blacklist-a telh zingah hian Belarus aṭanga ralthuam leh aircraft latu nia sawi, Dynasty International neitu Aung Moe Myint leh Hlaing Moe Myint leh company director Myo Thitsar-te pawh an tel tih US Treasury thuchhuah chuan a tralang. Hemi rual hian an hrekna siam hian Myanmar mipui, sipai rorelna rawng tak tuar mekte a nghawng dawn lo tih a sawi lang bawk.

US Secretary of State Antony Blinken chuan Myanmar sipai sorkarin Russia leh Belarus inzawmna a siampui avanga he hrekna thar ber hi a siam a nih thu a sawi. Myanmar mipuite beitu leh, dik lo taka Russia-in Ukraine a run thlawptute lakah chuan hrekna an siam zel dawn tih a sawi.

US Department of State chuan police hotu hlui leh deputy home affairs minister Than Hlaing chu lungawi lohna lantirtute rawng taka thahnaa inhnamhnawia puhin a hrek tel bawk.