Spain-in independence ṭhulh turin ni riat hun a pe

Spain sorkar chuan Cata­lonia sorkar chu Spain aṭanga indepedence a tumna chu  ṭhulh turin a ti a, ni riat hun a pe. Hun pek chhunga inlak hran tumna hi ṭhulh a nih loh chuan Catalonia bial thuneihna chu tihtawpin, sorkar laipui rorelna hnuaiah dah a ni ang.

Spain aṭanga indan duh leh duh loh chungchanga Catalonia mipuite ngaihdan lak hnuah, Thawhlehni khan Catalonia Parliament-ah hemi chungchang hi sawiho leh a ni. A hmaa ruahmanna awm ang chuan Thawhlehni zan khan Catalonia hian Spain aṭanga independence thu hi puan an tum a, mahse Catalonia President Puigdemont chuan independence puan hun tur hi tikhawtlai a, Spain sorkar nena inbiakna neih phawt an tum tih a sawi.

Nilaini khan Spain PM Rajoy chuan TV-a thu a sawiah, cabinet meeting chuan Catalan sorkar hian Catalonia bial independence a puan dawn leh dawn loh tichiang tura ngen a remtih thu a sawi. October 16 thleng Catalan sorkar chu hun pek a ni dawn a, Puigdemont hian independence an puan thu hi a nemnghet a nih chuan sawifiah turin ni thum hun pek belh ani leh ang.

Hun pek chhunga Puigde­mont-an independence puan hi a nemnghet a nih chuan sorkar laipui a inrawlh tawh dawn a ni. Mahse independence hi a puang lo a nih chuan, left party CUP chuan a kaihhruai sorkar a thlawpna chu hnuhdawh a tum thung.