Vietnam ram tuilianah mi 37 an thi
Vietnam rama ruahsur nasa avanga tuilian leh leiminah mi 37an thi a, chin hriat lohin mi 40 chuang an awm bawk. Chenna in leh thlai chin tam tak a chhe bawk a ni.
Vietnam Disaster Management Authority chuan nimin khan thuchhuah siamin, an ram hmarlama tuilian leh leimin avangin mi 21 in hliam an tuar thu a tarlang a, in 1,000 chuang a chhiat bakah, in leh infrastructure dang 16,740 vel chu tuilian hian a chim thu a tarlang bawk. Tuilian hi hmar chhak leh ram laili laia province parukin an tuar niin a sawi.
Tuilian tuar nasa ber chu hmarlama Hoa Binh province niin, mi 11 an thi a, chin hriat lohin mi 21 an awm bawk. Thi zingah hian nimin zinga leiminin a chhilh, chhungkaw pali ami te pawh an tel niin an sawi. Ninh Binh province-ah chuan tuilian vang hian mi 200,000 chu hmun him lama sawnchhuah tura tih an ni. Agriculture Minister Nguyen Xuan Cuong chuan chin hriat loha awmte zawn hna hi thawh mek a nih thu a sawi. Tunkar nithum chhunga ruahsur chu hun rei tak chhunga an rama ruahsur nasat ber ṭum a nih thu sawiin, ni thum chhung hian centimeter 50 chuang a sur hman niin a sawi.