UNESCO aṭangin US inhnukdawk
US chuan United Nations Scientific and Cultural Organization (UNESCO) chu Israel enhranga puhin, he pawl aṭang hian a inhnukdawk tih Ningani khan a puang.
US Secretary of State Rex Tillerson chuan UNESCO Director-Genreal Irina Bokova hnenah an thutlukna siam hi a hrilh a, kum 2018, December 31 aṭangin UNESCO ah hian an tel tawh dawn lo a ni.
UNESCO hi UN agency zingah full member-a Palestine pawm hmasa ber a ni a, kum 2011 khan a lo pawm tawh a ni. Hei vang hian US chuan a duh lo a, UNESCO hnena fund a pek pawh a lo titawp tawh a ni.
State department thupuangtu, Heather Nauert chuan UN agency-a inhnuhdawh fel hnuah a thlakna turin osberver mission a din dawn tih a sawi.
Israel chuan US thutlukna siam chu fakin, huaisen leh rilru dik tak pua siam a ni tih a sawi a, UNESCO chu awmze neiloa thiltihna hmun niin a sawi. Israel Prime Minister Benjamin Netanyahu chuan US rual hian UNESCO aṭanga inhnukdawk ve nghal turin foreign ministry pawh inbuatsaih tura a hriattir thu PM office thuchhuah chuan a tarlang.
UNESCO hotu kalchhuak tur, Irina Bokova chuan US inhnuhdawk tur chu pawi a tih thu a sawi a, UNESCO chu US tan a pawimawh a, chutiang bawkin US tan pawh UNESCO chu a pawimawh hle a ni, a ti.
Hetih lai hian Palestinian National Initiative secretary-general Mustafa Barghouti chuan US sorkar thutlukna siam chu a dem thu a sawi a, an thiltih chu thil zahthlak tak a ni, a ti. Baghouti chuan, "UN agency hrang hrangte chuan Palestine state hi an la pawm chho zel dawn a, heng hunah hian US chu a inhnukdawk zel dawn em ni? Hei hi anmahni an intinatna mai tur zawk a ni", a ti.
US hian UN body hrang hrangten member state-a Palestine ram an pawm hi a duh lo a, Middle East-a inremna siam a nih hun nghah phawt a duh a ni.