Rakhine state dinhmun enfiahtu tur committe din

Myanmar State Counsellor Aung San Suu Kyi-i chuan an rama tualchhung buaina thlenna, Rakhine state dinhmun enfiahtu tur committee din a nih thu a sawi.

August thla-a security force-ten Rohingya helte lakah beihpui an thlak aṭang khan, Rakhine state-a Rohingya Muslim nuai nga chuang chu Bangladesh ramah an tlanchhe tawh a ni. Rohingya te chunga thil thleng chungchangah hian Myanmar sorkar chuan sawisel a tawk nasa hle a, a mimal takin Suu Kyi-i pawh Rohingya te thlavang hauh zawnga aw a chhuah loh avangin sawisel a ni fo a ni.

Ramdangte chuan Myanmar security force-te chetdan chu an rama Rohingya awmte thenfai tumna niin an puhsak a, mahse Myanmar sorkar chuan Rohingya helte chauh bitum an nih thu leh, tlanchhiate pawh hel nena inzawmna neite an nih thu a sawi thung.

Suu Kyi-i chuan raltlante harsatna tawh mek chungchangah an ram chuan sawisel a hlawh hle tih sawiin, an buaina chingfel tur hian mipuite chu an ṭanrual a ngai tih a sawi.

Rakhine state dinhmun enfiahtu tur committee, 'Union Enterprise for Humanitarian Assistance, Resettlement and Development in Rakhine' hi Suu Kyi-i hian a ho dawn a, Rakhine state-a boruak muanawm tak a awm a, hmasawnna hna kalpui a nih theih dan turte a ngaihtuah dawn a ni.