Israel-in Fatah-Hamas unity sorkar pawm dawn lo

Israel chuan Palestinian pawl pahnih, Fatah leh Hamas-ten sorkar inṭawm siam an tum chu Hamas-ten an ralthuamte an dahthla phawt a nih loh chuan a pawm dawn lo tih a sawi.

Fatah leh Hamas-te hian West Bank leh Gaza Strip-ah a hranin ro an rel ve vel a, mahse Palestinian ram chu rorelna pakhat hnuaiah dah a nih theih dan kawng an zawng a, sorkar inṭawm siam turin inbiakna an nei a, inremna an siam thei ta a ni.

Israel Prime Minister office chuan firfiak pawla a puan, Hamas-te hian an ralthuamte dahthla a, Israel an beih ṭhin an tihtawp phawt loh chuan, Gaza aṭanga pawikhawihna thleng reng rengah Hamas chu mawhphurtuah a la ngai zel dawn tih a sawi.

Israel PMO thuchhuah chuan, Palestinian National Authority leh Hamas ten inremn an siam chu khawvelin a pawmpui theih a ni tur a ni tiin, Quartet-in tiamkamna a siamte a zawm tur a ni, a ti.

Kum 1967 Middle East war-ah hian Israel hian Palestian ram, Gaza Strip leh West Bank hi lain a thunun zui a, ram hrang hrangten sawisel a hlawh phah hle.

Ningani khan Fatah leh Hamas-te chu Cairo, Egypt-ah inremna siamin, December 1 aṭangin Fatah kaihhruai hnuaiah sorkar inṭawm siam a, Gaza Strip-a Hamas rorelna pawh sorkar inṭawm kuta pek luh an rel a ni.