California ram kang vanga thi pung zel

California, US-a ram kang vanga thi chu mi 40 a tling tawh a, chin hriat lohin mi 100 chuang an awm mek bawk.

Kangmei chhuak hi ni ruk zet a ni tawh a, chenna in leh sumdawnna in 5,700 zet a kang chhe tawh a ni. Hmun 16-ah ram hi a kang a, kangmei ṭhelh hna hi kangṭhelhtu 10,000 chuangin an thawk mek a ni.

Kangmei chhuah nasatna hmun, Sonoma wine region-a Santa Rosa khuaah chuan Inrinni khan mi 3,000 chu hmun him lamah sawnchhuah an ni.

California Governor Jerry Brown chuan ram kang vanga chhiatna thleng chu rin phak baka nasa a nih thu a sawi. Kangmei a chhuah hnua hmun him lama sawnchhuah chu mi 100,000 an tling tawh a ni. Governor chuan mipuite chu harsatna an tawh mekah an theih anga inpui zel turin a chah a, an dinhmun chu a la hlauhthawnawm reng a ni tih sawiin, insawn chhuak tura thuneituten an ngen a nih pawhin zawm nghal zel turin a ngen.

Official-te chuan kangmei chhuah ṭhelh hna hi theihtawp chhuaha thawk mek ni mah se,thli a tleh tel avangin a kangkai chak a, ṭhelh mih a har hle niin an sawi. Hmun 17-a kangmei la chhuak mek ṭhelh nan hian air tanker, helicopter leh fire engine 1,000 chuang hman a ni. Ram kang ṭhelh pui tur hian Nevada, Washington, Idaho, Montana, New Mexico, North leh South Carolina, Oregon leh Arizona state aṭangin kangṭhelhtu tam tham tak tirh an ni a, Canada leh Australia aṭang pawhin team tirh anni bawk a ni.