US venna hnuaiah IS firfiakte awmna sawn - Syria
Syria state news agency, SANA chuan US kaihhruai Syrian Democratic Forces (SDF) te venhimna hnuaiah Islamic State (IS) firfiak eng emaw zat chu hmar lam, Raqqa khua aṭangin khawchhak lama Deir al-Zour province-ah sawn an nih thu a tarlang.
SANA chuan US kaihhruai ṭangrual ramte indo thlawhtheihna pawh IS ho hmunpui, Raqqa chungah hian beihpui thlak si loin ni hnih thlawh tir an ni bawk niin a sawi. US leh SDF hian Raqqa aṭanga IS firfiakte sawnchhuah an nih theihna tur hian inremna an siam a ni, a ti.
Syria news agency chuan tun ṭum hi US leh IS firfiakten inremna an siam ṭum khatna pawh a ni lo tih sawiin, Syria sipai leh IS firfiakte inbeihna bial lama firfiakte sawn an nih theihna turin inremna dang pawh an lo siam tawh ṭhin niin a sawi. State news agency chuan US leh SDF te thiltih dan chuan eng nge an tum ber tih hriatthiam a harsat thu a sawi. Firfiakte bei tura Syria sipaite an thlen hmain, US hian IS hruaitu sawm chuang chu Deir al-Zour aṭangin a lo la chhuak hman niin an sawi bawk.
Russia defence ministry pawhin US sipaite dahna hmun, Tanf area aṭanga firfiak 400 zet an kalchhuah lai pawhin US chuan he thil thleng hi a hre lo der tlat niin a lo puh tawh bawk a ni.
SANA chuan US hian nikum khan Tharda tlanga Syria sipaite post chu beiin, Syria sipai 90 an thih phah a, he thil thlen hnuah hian IS firfiakte chuan Deir al-Zour bul chu an lak theih phah niin a tarlang bawk. Hetiang thil thleng aṭang hian US chuan eng firfiak pawl pawh ni se, Syria a beihna tur remchangah a hmang duh a ni, a ti.