Rohingya raltlan zingah Fahrah naupang 14,000 an awm

Myanmar aṭanga Bangladesh rama Ro­hingya Muslim tlanchhe zingah naupang, nu leh pa nei lo 14,000 dawn an awm tel niin Bangladesh official chuan a sawi.

United Nations chuan August 25 aṭang khan Myanmar-a Rakhine state aṭangin Rohingya raltlan hi 536,000 an lut tawh niin a sawi. Bangladesh social services department chuan ratlan zingah hian naupang 32,000 vel awmin, an zinga 13,751 chu Rakhine state-a inbeihna thlenga an nu emaw pa emaw, leh a pahniha chante an nih thu a sawi. Tam tak chuan an nu leh pate chunga thil thleng pawh hre loin, an chhungte zuiin Bangladesh an thleng a ni tiin department deputy director Pritam Kurar Chowdhury chuan a sawi.

UN chuan Rakhine state-a Myanmar security force-te beihpui thlak chu, Rohingya te thenfai tumna niin a puh a, mahse hei hi Myanmar sorkar chuan phain, Rakhine helpawlte chauh bitum an ni tiin a sawi thung. Rakhine state-a inbeihna thlengah thing­tlang khaw tam tak hal a ni a, Rohingya te chuan pawngsual leh nghaisak te an tawk nasa hle niin an sawi.

Rohingya raltlante awmna turin Bangladesh-ah hian khawvela refugee camp lian ber siam a ni a, ram hectare 1,200-ah zauah an awmna tur hi siamin, he hmunah hian Rohingya mi 800,000 chuang an awm a ni. Chowdhury chuan refugee camp-ah hian naupangte pualin acre 200 chu siam a ni tih a sawi a, fahrah enkawlna tur hmun pawh siam tum a nih thu leh, enkawlna ṭha tak pek an nih tur thu a sawi.

Myanmar aṭang hian Ro­hingya tlanchhia an la awm reng a, kar kalta Inrinni zan pawh kha lawng hmanga Bangladesh-a luh tum Rohingya te chuanna lawng chesuala thi mi pathum ruang hmuh belh leh a ni. Heng mite nen hian lawng chesual vanga thi hi mi 34 an tling tawh a ni.