Catalan hruaitu laka hun tiam a ral

Spain sorkarin Cata­lonia bial hruaitu, Carles Puigdemont hnena Catalonia bial indepen­dence a puang nge a puang lo tih sawichiang tura hun a pek chu nizan khan a ral.

Carles Puigdemont chuan independence hi a puang ngei tih a nemngheh chuan, Ningani thleng a thusawi sut tur hian hun pek a ni ang. Mahse hemi chungchangah hian nimin tlai thleng khan thuchhuah engmah a la nei lo.

Kar hnih liamta khan Catalonia indan duh leh duh loh chungchangah mipuite vote lak a ni a, vote thlaktu mipui tam zawkin Spain aṭanga indan hi an duh a ni. Mahse he vote lak hi Con­stitutional Court chuan pawm tlak loh tiin a puang a ni. Vote thlak hnu hian Puigdemont chuan independence puanna hi a sign nghal a, mahse a taka kalpui tur hun tura tih erawh chu a ṭhulh rih a ni. Puigdemont chuan Catalan independence-na tur kalpui hmain Spain sorkar nen inbiakna neih leh phawt a duh niin a sawi.

Catalonia-a ṭang­rual sorkar chuan inde­pendence hi kaltlang pui turin Puigdemont hi an nawr reng a, hetihlai hian international politician-te leh Spain sorkar chuan ṭhulh turin an nawr thung.

Spain sorkar hian Puig­demont hi zawhna pakhat chiah sawifiah turin a ti a, chu chu inde­pendence a puang nge a puang lo tih a ni. Catalan hruaitu hian indepedence hi a puang ngei tih a sawi chuan, Spain sorakar chuan Catalonia regional government hi ṭhiatin, inthlang ṭha turin a ti thei dawn a ni. Mahse Puigdemont hian independence hi a puang lo tih a sawi chuan Spain thuneitute chuan dan a bawhchhe lo tiin an ngai thei dawn a ni. Mahse independence puan hi a pha leh a nih chuan, Catalan-a ṭangrual sorkar a siampui, Spain ṭanga an indan theih nana beitute chu a chungah an lungawi loh hle rin a ni thung.

Spain sorkar chuan Constitutoin Article 155 hmangin Catalonia bial-ah hian direct-in ro a rel thei dawn a, he article hi a hmang a nih chuan Catalonia regional government chuan public service chungchang-ah thu­tlukna siam turin thuneihna a nei thei lo ang. Hei bakah sorkar laipui thuneihna hnuaiah police-te pawh awm­in, inthlan ṭhat pawh a buatsaih nghal thei dawn a ni.