US-in Covid-19 dona kawngah Afghanistan pui dawn

United States chuan Afghanistan ram chu Covid-19 a dona kawngah US dollar maktaduai 36.7 in an pui dawn a, hei bakah hian hriselna leh zirna inte tihhmasawnna turin World Bank kaltlangin US dollar mtd 90 hmangin puih a ni dawn bawk.

US Secretary of State Mike Pompeo chuan a hma pawhin Afghanistan chu Covid-19 dona kawngah US-in a puih dawn thu hi a lo sawi tawh tih Kabul-a US embassy chuan a tarlang. World Bank kaltlanga pawisa an dawn tur hi Covid-19 hri leng chhung pawha hriselna kawngah leh zirna kawnga hma an sawn theihna tur atan tih a ni.  

Afghanistan Ministry of Public Health chuan an ramah hri kai hi mi 35,615 an awm tawh thu a tarlang a, heng zinga mi 23,739 enkawl dam tawh niin, he hri vanga thi hi mi 1,186 an awm tawh tih a tarlang bawk.