Russia-in Zaporizhzhia khawpui missile-in a kap, mi 17 an thi

Russia chuan Inrinni zan khan missile hmangin Ukraine-a Zaporizhzhia khawpui a kap a, mi 12 an thi tih Ukraine official-te chuan an sawi.

Regional official Oleksandr Starukh chuan in chim hnuaiah tangte an la awm a, thi zat pawh hi an la pun a rinawm thu a sawi.

Ukraine president Volodymyr Zelenskyy chuan nimin khan Zaporizhzhia khawpui beih a nih thu hi sawiin, thlamuang taka awm mipuite chu rawng taka beih an ni, a ti. Mi 12 an thih bakah hliam tuar 49-te chu damdawi-inah enkawl an ni a, an zingah hian naupang paruk an tel.

"Pawikhawihna rapthlak tak, firfiakte chetna a ni. He inbeihna thlen tir tura thupetu leh, khawpui beitute chu mawh­phurtu vek an ni," tiin President Zelenskyy chuan a sawi.

Zaporizhzhia city council secretary Anatoliy Kurtev chuan missile hmanga beihnaah hian khawpui chhunga chenna in 20 bakah multi-story building 50 vel a chhia niin a sawi bawk.

Inrinni liam ta khan Russia-in a luahsak, Ukraine-a Crimea Peninsula leh Russia inkal­pawhna lei chu kah chhiat a ni. He lei hi Russia-in Ukraine chhim lama a sipaite mamawh a pek luhna atana a hman ber a ni.

Russia sipaite hian tun hnaiah Zaporizhzhia khawpui hi an bei fo a, kar liam ta Ningani khan missile-in apartment building a kap a, mi 14 an thi. Kar liam ta vek khan civilian car convoy pawh beih a ni a, mi 30 an thi bawk a ni.