NKorea-in missile kapchhuak Kar 2 chhunga vawi 7 an kahchhuahna
North Korea chuan nimin zing khan tuipuiah ballistic missile pahnih an kapchhuak tih Seoul military chuan sawiin, kar hnih chhunga vawi sarih an kahchhuahna niin, nuclear ralthuam hmang US aircraft carrier-in Korean peninsula lama joint drill an neih hnu lawkah missile-te hi an rawn kapchhuak leh nghal a ni.
SKorea, Japan leh US chuan combined naval exercise an nei a, hei hian NKorea chu a tithinur hle a, inrunna hmahruaitu angah ngaiin missile enchhinna chu a chhanletna ṭha ber a nih thu a sawi.
South Korea military chuan Pathianni khan Kangwon province-a Munchon area aṭangin East Sea, Sea of Japan tiha an sawi lamah hian short-range ballistic missile pahnih kahchhuah a nih thu an tarlang. Heng missile-te hi km 350 a thui leh km 90 a sang a thlawk niin Seoul Joint Chiefs of Staff chuan a sawi a ni.
Japan pawhin missile hi kahchhuah a nih thu rawn nemnghetin, coastguard-te chuan missile-te hi Japan-a exclusive economic zone pawn lamah a tlak thu an sawi. Japan senior vice defence minister Toshiro Ino chuan Tokyo hian missile chungchang an zirchian mek thu leh, missile chu submarine-launched ballistic missile (SLBM) a nih theih thu a sawi.
SKorea chuan thla hmasa khan NKorea hian Pyongyang-ah May thlaa an lo enchhin tawh, SLBM chu kahchhuah an tum tih a lo sawi tawh a ni.
US military Indo-Pacific Command lam pawhin thuchhuah siamin, an thawhpuite nen uluk taka inbiakna an neihpui thu leh, NKorea missile programme chu inpumkhatna tichhe thei a nih thu a tarlang.