Jordan teacher association-te kum 2 chhung titawp turin hriattir

Jordan khawpui Amman prosecutor general Hassan Abdallat chuan kar liam ta Inrinni khan hriattirna tichhuakin, an rama Jordan Teachers Association (JTA) leh a hnuaia branch hrang hrangte office chu kum hnih chhung khar turin hriattirna a tichhuak.

Abdallat chuan kum hnih chhung khar tura hriattirna an pek chhan hi JTA council-ah hian sum hman dik lohna leh eirukna a awm vang a nih thu a sawi a, hei bakah hian council member 13 chu an ram security force-te chuan thu zawhfiah tura an man thu a sawi bawk. JTA member hi mi 1,00,000 chuang an awm.

JTA-te hian kar liam ta Nilaini khan nikum lam daih tawha an phut, an hlawh 50%-a tihsanna tura inremna an lo siam tawh anga sorkarin hma a lak loh avangin nawrh an huaihawt leh a ni. April thla khan sorkar chuan Covid-19 vangin zirtirtute hlawh chu kumin chhung atan a pun theih loh tur thu a tarlang a, mahse JTA  lam hian sorkar chu alo tiam tawh anga hlawh punsak turin an phut thung. Jordan ramah hian Covid-19 hri kai mi 1,154 an awm tawh a, heng zinga mi 1,036 chu enkawl dam tawh niin, thi hi mi 11 an awm tawh a ni.