North Korea-ah Covid-19 Hri kai pakhat hmuchhuak

North Korea chu hun rei tak Covid-19 hri kai awm lohna ram nia an inchhal hnuah, ramri bul khuaah hri kai pakhat hmuhchhuah a nih thu an ram media Korean Central News Agency (KCNA) chuan nimin khan a tarlang. 

Hri kai pakhat hriat chhuah a nih vang hian an hotupa Kim Jong Un chuan emergency meeting a ko nghal a, nimin khan Kim chuan ram pumah emergency puangin, hri kai hmuhna Kaesong khuaah lockdown a puang nghal bawk. 

Hri kai thar an hriat hi tun thla khan South Korea aṭanga dan loa North Korea-a lut ru niin KCNA chuan a tarlang. Kum thum kal ta khan NKorea laka a hel vangin SKorea-ah a kal a, kumin July 19 khan SKorea leh NKorea ramri bula khaw awm Kaesong khuaa ramri daidanna kulh bang chu a rukin a lawn liam niin a tarlang bawk.

Hri kai thar nia sawi hi test an neihpui dan kim chang erawh KCNA hian a tarlang lo a, mahse medical check up hrang hrang erawh neih pui a nih thu a sawi. Khung hran nghal niin midang a kaichhawn theih tur ang chi zawng zawng chu an zawn nghal thu KCNA chuan a tarlang. Kim chuan an ramah hri a darh loh nan an ram sipai unit-te chhui turin a hriattir a, dan loa an ram lut hi hrem ngei a tum bawk a ni.

Covid-19 hri leng tan tirh aṭang khan North Korea hi a inhma khua nasa em em mai a, Russia aṭang leh ramdang aṭangin coronavirus test kit 1000 chuang a lei tawh a ni. Ramri uluk taka ven hna a thawh bakah an ram mipui eng emaw zat chu inkhung hran tir an ni bawk. Mahse tun hnai khan inkhuahkhirhna khauh tak tak a hman te chu a thlahdul ṭhen a, hemi hnu hian hri kai hi hmuh­chhuah a ni zui ta niin a lang. Covid-19 hri kai la awm lohna ramte - Kiribati, Mar­shall Islands, Micronesia, Nauru, Palau, Samoa, Solomon Islands, Tonga, Turkmenistan, Tuvalu leh Vanuatu.