Spain-in Catalan bial tan ni thum hun pe leh

Spain sorkar laipui chuan Catalonia bialin independence puan a tum ṭhulh turin ni thum hun a pe tih Thawhṭanni khan a sawi.

Catalonia president Carls Puigdemont chuan sorkar laipuiin Spain aṭanga Catalonia bial indepedence puan leh puan loh chungchang sawichiang tura hun tiam a pek chu Thawhṭanni khan a tawp a, mahse hemi chhung hian Puigdemont hian chhanna mumal a la pe lo. Hemi hnu hian sorkar laipui chuan Ningani thleng a dinhmun tichiang turin hun a pe leh a ni.

Ningani zing, an ram huna zing dar 8 thleng Puigdemont hi hun pek a ni a, hemi chhunga channa mumal tak a pek loh chuan Spain sorkar chuan Catalonia regional government chu a thununna hnuaiah a dah nghal dawn a ni.

Deputy Prime Minister Soraya Saenz de Santamaria chuan hun a pek chhunga Catalan president-in thutlukna a la siam thei lo chu Spain sorkar chuan pawi a ti hle tih a sawi a, a thutlukna sawi tura ngen mai anih thu a sawi.

Puigdemont hian an bial mipuite vote laknaah vote thlaktu zinga 90% in indepedence an duh thu an sawi avangin, Catalonia chu independence state-a puang turin a inpeih thu kar hmasa khan a sawi. Mahse vote thlaknaah hian 50% pawh a tla pha lo a, inlakhran duh lote chuan vote an thlak ve duh lo a ni. Puigdemont chuan vote lak hnua independence a puan tum chu a ṭhulh rih a, Spain sorkar laipui chu inbiakna neihpui phawt a tum niin a sawi.