Malta-a bomb puakah in-vestigative journalist a thi

Investigative journalist leh blogger, sorkar eirukna chungchang report ṭhintu, Daphne Garuana Galizia-i chu Thawhṭanni kha Bidnija, Malta-a an chenna kawta bomb puakah a thi.

Daphe Garuan Galizia-i hi a pasal, Peter Caruana Calizia nen Bidnija-a hian an cheng a, Thawhṭanni tlai dar 3 vel khan an car hawh, Puegot 108 chu puakin a kang zui a ni. Bomb tipuaktu hi hriat an la ni lo.

Europe leh Malta-a NGO leh official hrang hrangte chuan Galizia-i chunga thil thleng hi an dem thu an sawi a, European Commission vice president Frans Timmermans chuan journalist-te thusawi thei lo tura siam a nih chuan zalenna a bo ang, a ti.

Galizia-i hian Panama Papers leak chungchang chu hun eng emaw chen chhui­in a lo report tawh a, report a tih­chhuah zingah Prime Minister Joseph Muscat-a nupui puhna chungchang pawh a tel. Kum 1980 chho aṭang khan Malta-a Sunday Times columinist a ni a, a hnuah Malta Independent-ah editor a ni. Kum 2008 khan blog, Running Commentary a siam a, Malta rama website lar ber a ni chho a ni. Vauna a dawn thu pawh police hnenah a lo report tawh a ni.

Malta sorkar chuan Galizia-i thah a nih dan chhuinaah FBI puihna a dil niin US official-te chuan an sawi.