WHO-in lockdown tihtawp hmanhmawh lo turin ngen

Ram tam zawkin hri leng avanga kharkhipna an siamte an thlahdul ṭan a, hetih lai hian World Health Organisation (WHO) chuan lockdown tihtawp chu hmanhmawh lo turin ram hrang hrangte a ngen a, an fimkhur viau loh chuan hri leng hi hluar thar leh thut thei a ni, a ti. 

Geneva-a Nilainia virtual briefing a neihah, WHO direc­tor general Tedros Adhanom Ghebreyesus chuan hri darh zel tur venna atan ram hrang hrangten tracking system leh quarantine dan ṭha tak an duan a ngai a ni, tiin a sawi. 

"Lockdown hi a tahtawla thlah dul leh, fimkhur theih­tawpa kal chhunzawm zel a nih loh chuan a la hlauhthawnawm reng a ni," tiin Ghebreyesus chuan a sawi. A thusawi hi WHO epidemiologist Mari Van Kherhove pawhin thlawpin, khakhirpna hi thlahdul vat a nih chuan, hri hi an rawn pung leh hluai thei a ni, a ti. 

Europe-a hri leng tuar nasa ram, Spain, Italy leh Ger­many-te chuan lockdown an thlahdul ṭan tawh a, he hri vanga thi tamna ber US pawhin khuahkhirhna hi an thlahdul 

ṭhen tawh bawk a ni. 

United Nations chuan khaw­vela hri leng mek, Covid-19 dona atan US dollar tluklehdingawn 4.7 mamawh belh a nih thu a sawi. 

UN under-secretary general for humanitarian affairs Mark Lowcock chuan hri leng hian ram rethei zawkte a nghawng nasa dawn tih sawiin, heng ramte chhawmdawl tura hma lak thuai a nih loh chuan tualchhung buaina, retheihna leh ṭam te an tawk  nasa dawn tih a sawi. 

UN in sum a mamawh belh hi ram rethei zawka hri kai te enkawlna tur damdawi leh a hmanruate leina tura tih a ni a, hei bakah hian ei leh in lama harsatna tawhte sutkianna tur program thar siamna atan tih a ni bawk.  UN chuan Covid-19 leng mek chu thla thum aṭanga thla ruk chhung hian ram rethei zawkah a la hluar zel dawn niin a chhut. 

Covid-19 kai chu nimin thleng khan ram hrang hrangah mi maktaduai 3.78 an awm tawh a, an zinga mi nuai 2.61 in an thihpui tawh a ni. He hri kai zinga maktaduai 1.27 chu enkawl dam an ni tawh bawk. 

US chu hri kai leh he hri vanga thi tamna ber a la ni zel a, mi 12,45,800 in kaiin Nilaini khan hri kai thar hi  8,220  an awm a, mi 73,145 hi he hri hi an thihpui tawh. Spain-ah Covid-19 kai hi 2,53,600 awmin Nilaini khan kai thar 3,100 an awm, hri vanga thi hi 25,857 an awm tawh bawk. Italy-a hri kai 2,14,450 an awm a, an zinga 1,440 chu Nilainia kai thar an ni, hri vang hian mi 29,684 an thi tawh a ni. UK chu hri kai tamna ram palina niin, mi 2,01,100 in an kai a, France leh Germany-ah hri kai hi 1,70,550 leh 1,67,372 an awm bawk a ni.