Ukraine khawpui ṭhenkhatah Russia-in bomb a thlak leh

Russia chuan Ukraine chu Crimea bial leh Russia inkalpawhna lei pawimawh tak kapchhiaa a puh hnuah, nimin khan Ukraine khawpui Kyiv bakah khawpui dang Lviv, Ternopil leh Dnipro-te chu a bomb zui leh.

Ukraine public broadcaster Suspilne chuan emegency service-te chuan Kyiv-ah hian thi leh hliam an awm thu sawi mah se, chanchin kimchang erawh an tarlang lo tih a sawi.

"Shevchenskivskyi district-a khawpui lailiah bomb puak ri vawi tam tak hriat a ni a," tiin Kyiv mayor Vitali Klitschko chuan Twitter-ah a tarlang.

Ukraine khawthlang lama Lviv, Ternopil leh Zhytomyr khawpuite bakah central Ukraine-a Dnipro-ah pawh bomb puak ri hriat a ni.

President Volodymyr Zelenskyy chuan nimin khan Ukraine khawpui hrang hrang beihnaah mi ṭhahnem tak an thih thu leh hliam tuar tam tak an awm thu sawiin, thla enge maw zat hnua bomb hmanga Ukraine khawpui beihna a thlen leh ṭum khatna a ni. Khawpuia pedestrian leh cycling bridge, kum 2019-a hawn, ' Klitschko bridge' chu Russia-in a tihchhiat zingah hian a tel. He lei hi khualzinte pawhin an tlawh nasa tak a ni ṭhin.

"Ukraine chung lamah air raid siren thawm hriat tur a awm reng. Vanduaithlak takin thi leh hliamte pawh an awm a ni. Khawngaihin intawmbukte lo chhuahsan suh u," tiin President Zelenskyy chuan social media lamah a sawi a, Russia chuan khawvel aṭanga Ukraine nuaibo vek duhah a puh bawk.

President Zelensky chuan Pathianni khan Zaporizhzhia-ah Russia missile strike vangin mi 13 vel an thi tih a sawi. He inbeihnaah vek hian mi 89-in hliam an tuar a, an zingah hian naupang 11 pawh an tel niin President office thuchhuah chuan a tarlang.

Hetih lai hian nimin khan Russia president Vladimir Putin chuan Crimean lei kahchhiat a nih chung­ changah security council chu meeting a neihpui a ni.