Venezuela-a leitawlhin in ṭhahnem tak hnawl
Venezuela khawpui Caracas chhim lama Las Tejerias khuaah La Niña vanga ruahpui vanawn sur vangin leitawlh rapthlak tak a thleng a, mi 22 vel an thih bakah mi 52 chuang chu chin hriat lohin an awm mek a ni.
Vice president Delcy Rodriguez chuan Pathianni khan chhiatna thlenna hmun hi a tlawh a, chhanchhuah hnathawktute chuan ngawrh takin mi bo zawn hna hi an kalpui mek a ni, a ti.
President Nicolas Maduro chuan hun harsa leh hrehawm tak an tawn mek thu a sawi bawk. Mi 1,000 velin chhanchhuah hna hi an thawk mek tih deputy civil protection minister Carlos Perez Ampueda chuan a sawi bawk.
El Pato lui kuang liamin tuilian hi thlenin, chenna in leh dawr tam tak a hnawl a, leitawlh nasa tak hi a thleng zui a ni. Caracas aṭanga km 67-a hlaa awm, Las Tejerias hi a tuar nasa ber a ni.