Malaysia PM-in Parliament a ṭhiat

Malaysia prime minister Ismail Sabri Yaakob chuan an ram inthlanpui hma zawka an neih theihna turin nimin khan Parliament a ṭhiat.

TV-a thu a sawiah, PM Sabri chuan an ram lal, King Sultan Abdullah Sultan Ahmad Shah remtihna pawh a la tih sawiin, an ram danpui behchhanin Parliament hi ṭhiah a nih thu a puang.

Parliament ṭhiah a nih aṭanga ni 60 chhungin inthlanpui hi neih a ngai dawn a, Election Commission of Malaysia chuan inthlan neih hun tur hi a puan thuai rin a ni.

Malaysia-a ṭangrual sorkara party lian ber, PM Sabri-a party United Malays National Organization (UMNO) chuan sorkar ngelnghet zawk a awm theihna turin inthlanpui buat­saih thuai an lo rawt fo tawh a ni. Kum 2020 February thlaa prime minister aṭanga Mahathir Mohamad a ban hnuah, prime minister pahnih ruat an ni hman tawh a ni. Ismail Sabri Yaakob hi nikum August thla khan PM atan lakluh a ni a, nimina Parlia­ment ṭhiah a nih zui tak avangin Malaysia chanchina PM dinhmun chelh rei lo ber a ni bawk.

Inthlanpui hi hun pangngaiah chuan kum 2023, September thlaa neih tur a ni. Mahse PM-in Parliament a ṭhiah tak avangin, thla hnih liam hmaa inthlan buatsaih hi a ngai dawn ta a ni.