Israel Supreme Court-in ṭangrual sorkar siam remti
Israel Supreme Court chuan Likud party hruaitu, prime minister Benjamin Netanyahu leh Blue and White party hotu, Benny Gantz-ten ṭangrual sorkar siam tura inremna an siam chu a pawmpui. Sorkar thar hi karlehah lakluh a ni ang.
Israel-ah hian sorkar thar siam thei an awm loh avangin thla 12 chhungin inthlanpui hi ṭum thum an nei hman a ni.
April thla khan Netanyahu leh Gantz hian thuneihna insem zai a, ṭangrual sorkar siam turin inremna an siam thei ta a ni. Kum thum chhung atana inremna an siamah hian Netanayhu hian prime minister dinhmun a chelh hmasa ang a, thla 18 hnuah Gantz hi PM a ni ve leh thung ang.
Cabinet minister tur pawh party pahnihte leh an thawhpui party dangte nen an insem bawk.
PM Netanyahu hi thamna dawng leh a thuneihna hmang dik loa puhna thubuai nei mek a ni a, hei vang hian Supreme Court-ah PM atana dah chhunzawm tumna chu dan kalh a ni tiin, sorkar thara a tel ve khapsak turin an phut a ni. Mahse court chuan Netanyahu kaihhruai sorkar thar ding tur hi dan hmanga lo dan theihna a awm lo tiin, eptu lamte ngenna hi a hnawlsak a ni.