Iraq PM thar Mustafa al-Kadhimi lalut

Iraq prime minister thar atan Mustafa al-Kadhimi chu Nilaini khan lakluh a ni ta. 

Kum 53 mi PM thar Mustafa al-Kadhimi hi intelligence chief hlui a nih bakah, journalist a ni ṭhin bawk. Iraq PM 50-na chiah a ni. 

Iraq parliament member 266 awmna chuan Nilaini vek khan Kadhimi rual hian a cabinet tur mi 15 a pawm a, midang panga erawh a hnawl thung. Kadhimi cabinet zingah hian interior minister atan Othman al-Ghanmi, defence minister atan Gomaa Enad ruat an ni a, anni bakah hian finance, housing, health, education leh minister dangte pawh an tel a ni.

Minister tura Kadhimi-a'n a rawt mi panga hnawl tak te hi trade, justice, culture, agriculture and migration leh oil and foreign affairs minister turte an ni. 

April 9 khan Iraq president Barham Salih chuan al-Kadhimi hi prime minister atan ruatin, ni 30 chhunga sorkarna siam turin a hriattir nghal bawk. 

PM thar atana lakluh a nih hnua thu a sawiah, al-Kadhimi chuan an ramin kawng hrang hranga harsatna tawkin hun khirh tak a hmachhawn mek tih a sawi a, mahse an harsatna neihte hi a kaihhruai sorkar thar chuan sutkian dan a zawng zel dawn a ni, a ti. Mipuite rin ngam sorkar siam turin a ministerial team nen theihtawp an chhuah tur thu sawiin, political party hrang hrangte pawh an ram tana lungrual taka an thawhho theih a beisei thu a sawi.