Belarus-in Russia pui turin sipaite a tir

Russia leh Ukraine-te indona thleng mekah, Belarus president Alexander Luka­shenko chuan Thawhṭanni khan Ukraine ramriah Russia sipaite pui tura an ram sipaite dah turin thupek a tichhuak.

Kum 1994 aṭanga Belarus President dinhmun lo chelh tawh, Lukashenka chuan Ukraine leh a thlawptu khawthlang ramte chet dan chu Bela­rus ram tan a him lo niin a sawi a, hei vang hian Russia sipaite bula an ram sipaite dah ve tur hian a ti a ni.

Thawhṭannia security meeting a kohah, President Lukashenko chuan, "Ukraine chuan Belarus ram beih chungchang hi an sawilang chauh ni loin, ruahmanna pawh an siam a ni," a ti. Ukraine chu a chunga thuneituten indonaa hnuhluh ve an nih theihna atan Belarus bei tur hian an nawr a ni, a ti bawk. "Hetiang thil thleng thei lak aṭanga inveng tur hian kum tam tak an lo inbuatsaih tawh a, a ṭul chuan kan chhang let ve zel dawn a ni," a ti.

Lukashenko chuan Russia president Vladimir Putin pawh biain, thil awmdan te a sawipui thu a sawi. Putin-a'n kar liam ta Inrinnia Ukraine-a Crimea bial leh Russia inkalpawhna, Crimea lei kahchhiat a nih hnua regional military group tirh a tumna pawh a remtihpui thu a sawi.

Hetih lai hian Russia chuan ngawrh takin Ukraine ram a beih chhunzawm zel. Nimin khan Ukraine khawpui Lviv leh Zaporizhzhia-te chu a bei leh a, Zaporizhzhia-ah hian mi pakhat a thi tih Ukraine official-te chuan an sawi. Thawhṭannia Russia-in Ukraine khawpui hrang hrang a beihnaah khan mi 19 an thi a, mi dang eng emaw zatin hliam an tuar tih Ukraine emergency service chuan a tarlang.