New Zealand thliarkara tangkhang whale 455 an thi

New Zealand conservation office chuan Chatham Island-a tangkhang whale 215 an thih thu a sawi hnu lawkah, Pitt Island-ah pilot whale 240 vel an thi tih a sawi leh.

Department of Conservation chuan heng thliarkar pahniha whale tam tham tak tangkhang hi kar liam ta Inrinni khan hmuh an ni tih a sawi. Heng thliarkar pahnihte hi New Zealand-a South Island khawchhak lam tuipui aṭanga km 840 vela hlaa awm an ni. Chatham Island-ah hian mi 800 vel chengin, Pitt Island-ah hian mi 40 an cheng a ni.

New Zealand leh Australia-ah hian tuipui lama whale-te an chhuah leh tangkhang hi a thleng leh ṭhin a, scientist-te chuan hetianga a ruala an chhuah vak chhan hi hriatchian theih a nih loh thu an sawi rualin, researcher ṭhenkhat chuan tuipui kam hnaih lutuka ei tur pek an nih avanga thleng thei a nih thu an sawi. Thla hmasa khan Australia-a Tasmania khawthlang lamah pilot whale 200 dawn chu tuipui kamah chhuakin a lo thi tawh bawk a, a chhuak zinga 44 chu state wildlife service chuan chhanin, tuifinriat lamah an dah let leh thei a ni.

Chatham Islands-ah hian kum 1918 khan whale rual hi chhuakin an tangkhang zui a, 1,000 chuang zet an thi.