Catalan hruaitu mante chhuah phut

Spain-a Catalonia bial khaw­pui, Barcelona-a mi nuai hnih chuang zet pungkhawmin, Catalan inlakhran thlawptu pawl hruaitu pahnih mante chhuah phutin lungawi lohna an lantir.

Thawhṭanni khan National Catalan Assembly (ANC) hruaitu Jordi Sanchez leh Omnium Cultural hruaitu Jordi Cuixart-te chu Madrid-ah bail theih loha man an ni. An pahnih hian ram dodal zawnga thu sawia puhin chhui chian mek an ni. Thawhlehni zan khan Catalan hruaitute man an nih avanga lungawi lohna lantirin kawngzawh hi huaihawt a ni a, Sanchez leh Cuixart-te chu chhuah zalen tura an phut thu pungkhawmte chuan an sawi.

Omnium leh ANC hi Cata­lan indepedence thlawptu leh, independence an neih theihna tura campaign-naa theihtawpa beitu an ni. October 1-a independence duh leh duh loh chungchanga Catalan bial mipuite vote laknaah pawh an phusa nasa hle a ni. Mahse Spain constitutional court chuan October 1-a Catalan mipuite vote lak hi dan kalh niin a sawi a, vote thlak tur dang turin police-te pawh a lo hriattir a ni.

Thawhlehni han Consti­tutional court chuan Catalonia parliament-in referendum law a pass chu a hnawlsak a, hei vang hian October 1-a vote lak hi dan anga pawm a ni thei dawn lo a ni. Court chuan judge 13 ten lungrual takin referendum law chu ram danpui kalh tia an puan thu a tarlang.

Spain sorkar laipui chuan Cata­lan hruaitu Carles Puigde­mont chu Catalan independence a puan leh puan loh tichiang turin vawiin thleng hun a pe. Puigdemont hian independence puan hi a nemnghet a nih chuan, Catalan sorkar chu ṭhiatin sorkar laipui rorelna hnuaiah dah a ni ang a, inthlan ṭhat pawh a buatsaih zui thei dawn a ni.