Judge-in Trump-a travel ban a dansak

US President Donald Trump-an Muslim tamna ram aṭanga an rama zin luh tumte tana khuahkhirhna thupek a siam chu Hawaii-a federal judge chuan a dansak.

President travel ban hi a taka hman ṭan a nih hma lawkin, US District Judge Derrick Watson hian he khapna thupek hi a hmaa thupek a lo siam tawh ang bawka la fel tawk lo nia sawiin a dansak leh a ni. Hei hi President-in travel ban a tihchhuah dansak a nih ṭum thumna a ni.

President Trump-an Muslim tamna ramte tana US-a zin khapna thupek a siam chu Hawaii state-in a khing let a, hei judge Derrick Watson chuan a ngaihtuah hnuah a dansak leh ta a ni. President travel ban siam hian chhungkua a ṭhenhran bakah, zirlai lak thar tur thlengin a nghawng thei dawn niin a sawi.

White House thu­puangtu Sarah Huckabee Sanders chuan federal judge thutlukna siam chu sawiselin, thil ṭha lo tak a ni, a ti. Sanders chuan president in America mipuite himna tura a hmalakna ngaih pawimawh lohna niin a sawi. Justice Department pawhin an appeal tur thu a sawi.

Travel ban hi Sep­tember thla khan puan a ni a, nimin aṭanga hman ṭan tura tih a ni. He khapna thupekah hian Chad, Iran, Libya, North Korea, Somalia, Syria leh Yemen mite chu US-a an zin luh khap a ni a, hei bakah hian he khapna hian Venezuela sorkar official leh an chhungte pawh a huam tel bawk a ni. Trump-a kaihhruai sorkar chuan he zin khapna thupek hi ram hrang hrang security dinhmun leh, US laka information a pek duh dan a zira siam a nih thu a tarlang.