Myanmar sipaiten Rohingya mi tam tak tihlum : Amnesty

Human rights group, Amnesty Interna­tional chuan nimin khan Myanmar chung chang report tichhuakin, Myanmar security force-te chuan an ram aṭanga Rohingya Muslim-te umchhuah tuma an beihnaah, mi tam tak an tihhlum a, an zingah hian naupang pawh eng emaw zat an tel niin a sawi.

Myanmar security force-ten Rohingya hel laka beihpui an thlaknaah civil mi tam takin kut an tuar a, Rohingya chenna khuate pawh halsak niin, sipaite kutah hian nghaisak, pawngsualte an tawk nasa nia sawi a ni. Sipaiten beihpui an thlak hnu, August 25 aṭang khan Bangladesh ramah Rohingya raltlan 580,000 vel an lut tawh a ni.

Myanmar sorkar chuan a sipaite thlavang hi hauhin, Rohingya helte chauh bitum niin a sawi a, mahse United Nations leh ram dangte chuan Myanmar sorkar chhanna hi an pawm lo tih an sawi.

Amnesty International chuan Rohingya raltlan 120 chuang kawm kualin, an kawmna aṭang hian Myanmar sipaiten Rohingya chenna thingtlang khuate hualin an bei a, tlanchhiat tumte chu kap zuiin, an inte an halsak a, tlanchhe thei lo kum upa zawk leh rualbanlo leh damlote chu an kang hlum nasa hle tihte hriat a nih thu a tarlang. Khaw ṭhenkhatah chaun hmeichhiate chu pawngsual an nih bakah, nawmnah taka nghaisak te an tawk a ni, a ti.

Amnesty crisis researcher, Bangladesh-Myanmar border-a hun eng emaw chen thil awmdan zirchianga lo awm tawh, Matthew Wells chuan rights group chuan Rohingya te chunga tawrhna thleng chungchangah report tihchhuah leh a tum dawn tih a sawi.