NATO-in nuclear exercise nei dawn
North Atlantic Treaty Organization (NATO) chuan hun rei tak aṭanga an lo ruahman tawh, nuclear exercise chu Russia -Ukraine indona thleng mek mah se ruahman lawk angin kar lehah neih tho a tum.
NATO Secretary-General Jens Stoltenberg chuan Russia president Vladimir Putin-a'n an ram vawnghim turin thapui an thawh dawn tih sawi mah se, nuclear exercise hi kaltlangpui a ni dawn tih a sawi.
He exercise, "Steadfast Noon" tiha sawi hi NATO hian kumtin an nei ṭhin a, kar khat chhung a awh ṭhin. Nuclear warhead phur thei fighter jets pawh hmang ṭhin mah se, live bomb erawh a tel ngai lo thung. Conventional jets, surveillance leh refuelling aircraft-te pawh exercise-ah hian an tel ṭhin a ni.
NATO member ram 30 zinga ram 14 te chu exercise-ah hian an tel dawn a, hei hi kumin February thlaa Russia-in Ukraine a run hma aṭang tawha an lo tihfel tawh a ni. Exercise an neihna pui ber tur hi Russia aṭanga km 1,000 vela hlaah a nih tur thu NATO official chuan a sawi.
"Ukraine-a indona thleng mek avanga kan exercise neih ṭhan kan ṭhulh thut chuan ngaihdan dik lo zawk a thlen thei a ni," tiin Stoltenberg chuan Brussels-a NATO defence minister meeting-ah a sawi a ni.
Ukraine-a indona thleng mekah khawthlang ramten ralthuam an pek, Ukraine sipaite beihna avangin Russia sipaite chuan hnungtawlh lam an pan mek a, Putin pawhin ngawi renga awm a tum loh zia lantirin Ukraine region pali te chu kar hmasa lam khan an thuneihna hnuaia awm a nih thu puangin, sipai reserve nuai chuangte chu ralhma tawng lamah ṭang turin a ruat. Putin chuan an ram venhimnan nuclear ralthuam hman a hreh loh zia vawi duai lo a lo sawi tawh bawk.
NATO hian organisation ang chuan ralthuam kawl an nei ngai lo. NATO kaihhnawiha nuclear ralthuamte chu heng ram pathum - United States, United Kingdom leh France thuneihna hnuaia awm an ni.