UN Human Rights Council member atan ram 14 thlang

UN General Assembly ṭhukhawm chuan Human Rights Council member hlui kalchhuakte thlaktu tur ram 14 an thlang chhuak.

Secret ballot kaltlanga vote thlakah, Africa thliarkar aiawhin Algeria, Morocco, South Africa, Sudan; Asia-Pacific aiawhin Bangladesh, Kyrgyzstan, Maldives, Vietnam; Europe khawchhak lamah Georgia, Romania; Latin America leh Caribbean aiawhin Chile, Costa Rica, Europe khawthlang lam aṭangin Belgium leh Germany-te chu January 1, 2023 aṭanga inṭanin kum thum chhung member atan hian an thlang a ni.

Ram 14 thlan chhuah zingah, Sudan leh Germany-te hi a zawna term hnih thlan an ni.

Geneva-a hmunpui nei, UN Human Rights Council hi inter-governmental body niin, khawvel pumah mihringte dikna vawnhim kawnga hmalatu an ni. Member 47 awmin, heng zinga hmun thuma ṭhena hmun khatte chu kumtin thlak an ni ṭhin a, council member-te hian kum thum term chelh tura thlan an ni ṭhin. Member hi a zawnin term hnih chin bak an ni thei lo bawk.

UN Human Rights Council-a seat-te hi region hrang hrang aiawha thlan ṭhin a ni a, Africa leh Asia tan 13 ve ve, Latin America leh Caribbean tan 8, Western Europe leh a dangte tan 7; Eastern Europe tan 6 bithliah a ni.