Nepal tuilian leh leiminah mi 33 thi tawh
Nepal khawthlang lama tuilian leh leimin nasa tak thleng vangin kar liam ta chhung khan mi 33 aia tlem lo an thi tawh niin tualchhung media-te chuan an tarlang.
An ram hmar thlang lama Karnali province chuan chhiatna hi tuar nasa berin, mi sang chuangte chu an chenna hmun aṭanga thiar chhuah an ni tawh a ni. Leitawlh leh tuilian hian chenna in 100 chuang a tichhe tawh a. Province-a cheng mi 22 vel thi tawhin hliam ṭhahnem tak an awm tawh bawk.
Chhanchhuah hna thawktute chuan ruah a sur nasat avangin tlangsang lamte chu kalpawh a harsat thu an sawi. "Police officer-te vil tir reng an ni. Surkhet aṭangin chhanchhuah hna thawk turin helicopter ruahman a ni," tiin police thupuangtu chuan a sawi. Mahse khua a la ṭhat theih loh avangin an duh angin hma an la chak thei lo a ni.
Karnali province-a hmun ṭhenkhatah Karnali lui tui feet 39 chuang a sangte an ni tawh a, lui chunga suspension bridge siamte pawh eng emaw zat len bo a ni tawh niin emergency thuneitute chuan an tarlang.
UN aid agency-te chuan Banke district lamah chhawmdawl ngaite hnenah eitur an pechhuak a, khawthlang lam bialah chuan sorkarin helipcoter hmangin chhawmdawlnate an pe bawk.