Rohingya buainaa mawhphurtuah Myanmar sipaite puh
US Secretary of State Rex Tillerson chuan Myanmar-a Rohingya Muslim ten buaina an tawh mek chungchangah US chuan Myanmar sipaite chu mawhphurtuah a ngai tih a sawi.
Tillerson chuan Rohingya te chunga thil thleng mek chu an ngaihven reng tih sawiin, Myanmar hruaitu Aung San Suu Kyi-i pawh an biak thu a sawi. "Buaina thlen chungchangah sipaite chu mawhphurtu berah kan ngai a, hetianga civil mite chunga tawrhna nasa tak thleng hi khawvel chuan a enliam mai mai dawn lo a ni", a ti.
Kar sarih liamta chhung khan Myanmar aṭang hian Rohingya mi nuai nga chuang zet chu Bangladesh ramah an tlanchhe tawh a ni.
Rohingya te chunga tawrhna hrang hrang thlengte chu khawvelin a dem a, an buaina chinfel dan kawng zawng turin Myanmar sorkar pawh an nawr reng a ni.
Hetih lai hian Myanmar sorkar chuan beihpui a thlak mekah Rohingya helte chauh bitum an nih thu a sawi thung. Buaina chhuahna bul chu Rohingya helten Myanmar police post an beih vang a ni a, hei vang hian sipaite hian Rohingya ho chenna, Rakhine state-ah nasa takin beihpui an thlak zui a ni.
US chuan Myanmar sorkar in Rakhine-ah helho beih a tawk tih chu a hriatthiampui thu Tillerson chuan a sawi a, mahse a beihletna kawnga sipaite chet dan chu demin, inthununna ṭha tak hnuaia kalpui tur a ni, a ti.