Portugal PM-in ngaihdam a dil

Portugal Prime Minister Anto­nio Costa chuan kar kaltaa ram kang vanga mi 42 thihna thleng chu pawi a ti takzet tih sawiin, an ram mipuite hnenah he thil thleng vang hian ngaihdam a dil.

Nilaini-a Parliament inkhawm­ah Social Democratic Party (PSD) hruaitu Hugo Soares chuan ramkang vanga mi tam tak thihna thleng chungchang hi a sawi chhuak a, PM chu ram kang nasa tak a thlen avanga Portugal mipuite laka ngaihdam dil tura a phut thu a sawi.

Hemi hnu hian PM chuan an ram mipuite hnenah ngaihdam a dil nghal a, chhiatna thlengah chuan mawhphurhna a lak thu a sawi bawk.

Pathianni khan Portugal hmarlam leh ram laili lai hmun 500 chuangah ram a kang a, mi 42 in an thih phah bakah, mi 70 chuang an hliam bawk. Thla li liamta chhungin Portugal-ah hian ram kang vangin mi 100 chuang an thi tawh a ni.

Chhiatna thleng chungchanga sorkar hmalak danin sawisel a hlawh hle a, Minister of Internal Administration Constanca Urbano de Sousa chuan Nilaini khan a ban thu a puang a, Central Social Democratic-Popular Party chuan kar leh hian sorkar rin tawk lohna motion put luh a tum bawk.