Russia-in Ukraine ram laksak a tumna United Nations-in a dem
United Nations General Assembly, Nilainia ṭhukhawm chuan Russia-in dik lo taka Ukraine region pali a awp mekte laksak a tumna chu an dem thu an sawi. Member ramte chu Russia hmalakna chu thlawp lo tur leh, an ram ṭhenawm runtu Russia an hreknate chu kengkawh chhunzawm zel turin a ngen.
Member ram 193 awmna, General Assembly-a ram 143-te chuan Ukraine-in an ram chhungah thuneihna, zalenna, inpumkhatna leh territory pumkhatna an neihna resolution thlawp zawngin vote an thlak a ni.
Resolution pawm lo lamah hian Russia tih loh ram dang pali chauhin an vote a, chungte chu Syria, Nicaragua, North Korea leh Belarus-te an ni. Russia ṭhianṭha China bakah ramdang 35 te chu vote laknaah hian an hai bawk.
"Vawiinah chuan Russia-in Ukraine a run. Mahse, naktukah erawh ramdangin mi dang ram an tichhe ve thei. Nangni pawh in ni thei a, a dawttu in ni thei. Chutiang hun a lo thlen chuan he chamber hi engti turin ngen in inbeisei ang?"tiin Thomas-Greenfield chuan vote thlak hmain General Assembly-ah hian a sawi a ni.
Russia hian September thla khan Ukraine region-a a luah ṭhen sak - Donetsk, Luhansk, Kherson leh Zaporizhzhia-te chu mipuite duhthlanna hmang ngeiin a thuneihna hnuaia dah an ni dawn tih a puang a ni. Hetih lai hian Ukraine leh an thawhpui ramte chuan Russia chu dan kalh zawnga cheah leh mipuite pawh tihluihna hmanga vote thlak tirah an puh thung.
General Assembly-in vote an thlak zawh hian Russia chuan thla hmasaa member 15 awmna, Security Council-a resolution siam a 'veto' hmangin an lo hnawl leh a ni.
Russia-a UN ambassador Vassily Nebenzia chuan vote thlak hmain General Assembly hnenah, resolution siam chu politics inrawlh leh ualau taka inbeihna a ni tiin, buaina chinfel kawnga an hmalakna zawng zawng tichhe vek thei thil a nih thu a sawi.