White House Chief of Staff-in Donald Trump thlavang a hauh

White House chief of staff John Kelly chuan President Donald Trump-a'n Nigeria-a pasal sun ta na taka a ṭawngkum ni an puhna chu chhangin, thu belhchian dawl lo a nih thu a sawi.

Florida Democrat Congresswomen, Frederica Wilson chuan US President Donald Trump hian October 4 khan, Nigeria-a Islamist sipai-te'n US sipai an thah zinga pakhat Sgt. Johnason-a nupui Myeshia Johnson hnenah a pasal thihna chungchanga ṭawngkam dengkhawng tak a chhahchhuah thu a sawi a ni. Wilson hian Donald Trump chuan Ms. Johnson-i hnenah hian a thil tawn tur hresa renga kal a nih thu leh hetiang thil a thlen tak siah chuan a na tho a nia nge tiin, lusun tuar mek tana hriat nuamlo taka a ṭawngkum thu a sawi a ni. Hei hian US mipuite ngaihah Donald Trump hi a tihmingchhe hle a ni.

John Kelly chuan he thu hi thu belhchian dawl lo nia sawiin, an puhna avang hian Donald Trump chuan hrehawm a ti hle tih a sawi. Kelly hian kum 2010-a a fapa Afghanistan-a thah a nih ṭum khan, khatih laia President Obama hnen aṭang khan call takngial pawh a dawn loh thu a sawi bawk a ni.

Trump pawn Wilson-i thusawi hi dawt a nih thu leh a phauhchawp mai mai a nih thu a sawi ve bawk a ni.

Hetih lai hian Wilson-i ve thung chuan Sgt. Johnson-a kuang an khua, Miami-a rawn thlen hnu lawkah he thu dengkhawng tak hi Ms. Johnson-i bulah hian sawiin, Johnson-i pawh hi nasa taka a ṭah phah thu a sawi a ni.

Kelly chuan, "Wilson-i'n President a beih dan hi a mak lutuk a, Washington khaw daia sipai-te an phumna hmun Arlinton National Cemetery-ah darkar khat lai ka kal kual hial a ni" a ti. Chief of staff hian President chu lusun chhungte call lo tura a tih thu leh call pawh ni la an rilru a zangkhai phah chuanglo ang tiin, call lo mai tura a hrilh thu a sawi. Phone call vanga lusun tuarte rilru dam chhan tur a awmlo a tibawk.

Kelly chuan Pentagon in Sgt. Johnson leh midang pathum African khawthlang rama an thih dan hi chiang zawka an chhui mek thu a sawi bawk a ni. Mahse Senator John McCain, Senate Armed Services Committee Chairman ve thung chuan hemi kaihhnawihah hian eng thuchiang mah an dawn loh thu a sawi. Reporter-te'n eng information nge ila mamawh ti a an zawhna chu "Engkim" tiin a chhang a, White House lam aṭang pawha eng thupek mah an la dawn loh thu a sawi bawk.

October 4 khan Nigeria-ah US Special Force mi 12-te chu Green Berets kaihhruaina hnuaia khawtlang hruaitute nen meeting nei tura an kal lai chu ISIS sipai 50 laiin an lo ambush a ni. US sipaite motor chuanna hi ralthuam hmanga thuam a nih loh bakah, sipaite hian rifle chiah an ken avangin an che theilo hle a, darkar chanve lai an inkah hnuah French sipai ten helicopter hmangin US sipaite hi an rawn chhan a ni. He inkahnaah hian US Special Force mi pali-te chuan nunna an chan a ni.