Afghanistan-ah Pakistan sipai hotu Drone hmangin that

Pakistan-a Islamist sipai hotu Omar Khalid Khorasani chu kar hmasa-a US Drone ni ngeia hriatin Afghanistan a beihnaah khan thah a ni.

Omar Khalid Khorasani kaihhruai Jamaat-ul-Ahrar pawlte hi Pakistan-a bomb puahna hrang hranga in­hnam­hnawih ngei nia hriat an ni a, kar hmasaa drone-in Afghanistan a beihnaah khan Omar bakah hian midang 9 an thi tel bawk niin report chuan a tarlang.

Local Media lam chuan Afghanistan border beihnaah hian mitthi zat hi an la pung zel a, 40 dawn ISIS sipai ni ngeia rinhleh hi an thi tawh niin a report ve thung a ni.

US Secretary of State Rex Tillerson-a'n Pakistan a tlawh hma lawka thil thleng hi Analyst-te chuan Islamabad-in Washington, Pakistan leh Afghanistan border vela biru mek ISIS-te bei tura an nawrna avang niin a sawi. Omar hi kar hmasaa Drone-in Afghanistan ramri a beihnaah khan hliam a tuar ngei niin thu a thang a, Ningani khan Jamat-ul-Ahrar te hian a thi a ni tih thuchhuah an siam ta a ni.

An pawl thupuangtu Asad Mansoor chuan,"Kan pawl Jamat-ul-Ahrar hotu Omar Khalid Khorasani chu tunhnaia US Drone in Afghanistan Paktia province a beihnaah a hliam a, a hliam tuar lo hian Nilaini chawhnu khan a boral ta a ni", a ti. Midang 9-in nunna an chan thu a sawi bawk.

Jamat-ul-Ahrar-te hian nikuma Easter Sunday khan Lahore, Pakistan-a bomb a puah chungchangah khan mawhphutu niin an inchhal a, khami ṭum khan mi 70 laiin nunna an chan a, heng zingah hian naupang 29 an tel a ni.

Quetta damdawiin a thihchilh bomb puak vanga mi 74 laiin nunna an channa pawh kha an tih a nih thu an lo sawi tawh bawk a ni. Jamt-ul-Ahrar pawl hi Pakistan chhunga bomb puak hrang hrangah an inhnamhnawih nasa hle a ni.

Jamaat-ul-Ahrar te hian 2014 khan Islamic State nen inremna thuthlung an siam a, mahse 2015 khan Paksitan Taliban al-Queda nena ṭangrual te chu an zawm ve leh a ni.

Khorasani hi 2015-a Afghanistan a Nato air strike-ah khan hliam na tak a tuar a, mahse khami ṭum khan a damchhuak leh a ni.