North Korea-in US lak aṭanga inla hrang turin Australia ngen
Australia sorkar chuan thuchhuah siamin, North Korea hnen aṭangin Trump-a lak aṭanga inthiarfihlim tura ngenna document a dawn thu a tarlang.
He an thu dawnah hian US President-in America chuan a himna tur a nih phawt chuan North Korea a tichhe vek ang tia a vauna chu an dem thu a tel a ni.
Australia PM Malcom Turnbull chuan hetiang lehkha hi ram dang pawhin an dawn thu a sawi bawk. Turnbull chuan North Korea aṭanga an lehkha dawn chu mi dangte hneh an tumna a nih thu a sawi a ni. He lehkha phek khat lek hi Indonesia-a North Korea embassy
aṭangin Pyongyang Supreme People's Assembly-a Foreign Affairs Committee kaltlangin an dawng a ni.
He an lehkha dawnah hian Australia sorkar chu Trump-a thuneihna hnuaia chet lakna ṭhalo tak leh fimkhur thlak loh tak aṭanga inthiar fihlim tura hriattirna mai bakah US chu nuclear vanga chhiatna a mawhphurtu a nih theih thu a inziak bawk a ni.
Turnbull chuan North Korea chu Japan, South Korea leh United States-te nuclear missile hmanga a vauna vanga phawklekna siamah a puh a, circular ang maia hetiang lehkha hi ram hrang hranga an thawndarh thu a sawi bawk a ni.
Australian Foreign Minister Julie Bishop chuan North Korea aṭanag lehkha an dawng chu thil la thleng ngailo a nih thu a sawi ve bawk.
Australia PM chuan an lehkha dawn chu Donald Trump hekna leh sawichhiatna mai nia a lan thu a sawi a, Julie Bishop leh Turnbull-te hian khawvel ram dangin North Korea a pressure a pek chu a hlawhtling ni a alanna niin an ngai a ni.
Pyongyang chuan Inrinni khan Australia chu vauin Kim Jong-un chungchanga America ngaihdan a ṭawmpui a nih chuan chhiatna a pumpelh lo ang, a ti.
North Korea hian tunhnaiah khawvel a tiphawklek hle a, vawi 6 nuclear test nei tawhin, vawi 2 lai Japan ram chung zawnah missile a kap tawh bawk a ni. Hetih lai hian US Secretary of State Rex Tillerson chuan Trump-a'n inbiakna hmanga buaina chinfel a inpeih reng thu a sawi ve bawk a ni.