Ukraine-in NATO a zawm chuan Indopui III-na a thleng thei : Russia

Russian Security Council official chuan an ram ṭhenawm Ukraine-in US kaihhruai NATO military inzawmkhawm pawl a zawm a nih chuan Indopui III-na a thleng thei a ni, tiin Ningani khan a sawi.

Russia president Vladimir Putin-a'n September 30-a Ukraine ram 18% vel an thuneih­naah a awm tawh tih a puan hnu lawkah Ukraine president Volodymyr Zelenskyy chuan rang takin NATO member nihna hi a dil zui nghal a ni.

Ukraine tan NATO full mem­bership nih erawh a la hla deuh a, NATO member ram 30-in an remtih vek a ngai dawn a ni. "Ukraine hian he thil hi an bawhzui chhunzawm zel a nih chuan Indopui pathumna hi kan thleng ngei dawn a ni," tiin Russia's Security Council-a deputy secretary Alexander Venediktov chuan a sawi.

Putin-a ṭhianhnai tak leh thiltithei tak, Venediktov chuan Ukraine dilna hi mipui rilru hneh tumna a ni a, khawthlang ramte chuan NATO-a Ukraine member dilna chuan sawhkhawk tam tak a nei dawn tih an hrelawk sa a, NATO member vek te pawhin a hlauhawm zia an hrechiang hle a ni, a ti.

President Putin chuan United States-in khawchhak lama NATO zauh tumna chu a lo sawisel tawh ṭhin a, a bikin Soviet ram hlui Ukraine leh Georgia te Russia-in an awpna hnuaia a ngaihte thlenga an inrawlh chu a ngaithei lo hle a ni. Putin chuan September 21 khan khawthlang ram lakah Russia venghim turin nuclear ralthuam a hmang hreh lo tih a lo sawi tawh chu a ti mai mai lo tih a sawi bawk.

US president Joe Biden chuan khawvelin kum 1962-a Cuban Missile Crisis hnuah nuclear Armageddon thlen leh theihna hun sang ber a tawng mek tih a sawi. NATO hian kar leh hian nuclear preparedness exercise Steadfast Noon tih chu kalpui an tum.

Russia leh United States-te hi nuclear ralthuam nei tam ram niin, khawvela nuclear warhead 90% vel chu ram pahnihte thu­neihna hnuaia awm a ni.

Venediktov chuan Zelenski­yy-a'n Russia laka invenna tura ralthuam kapchhuak tura a tih chu thil hlauhawm tak a nih thu leh, nuclear indona chuan khawvel huapa chhiatna rapthlak tak a thlen theih tur thu a sawi. "Nuclear buaina hian khawvel huapin chhiatna a thlen thei tih kan hriat reng a ngai, Russia leh khawthlang ramte chauh ni lo, he khawvela ram tinte a nghawng vek dawn a ni," tiin, mihring zawng zawng tana chhiatna rapthlak thlen thei a nih thu a sawi.