Suu Kyi-i jail tan hun tur kum 26 a tling a tawh
Myanmar sipai rorelna hnuaiah an ram civil hruaitu hlui, Aung San Suu Kyi chu hremna pek belh zel niin, a thubuai hrang hranga a tan hun tura hremna an pekte hi kum 26 a tling tawh a ni.
Nikum February 1-a sipaiten civil sorkar thuneihna an hnehchhuh hnuah Suu Kyi-i hi hreng zuiin, thubuai hrang hrang an siambelh sak zel a ni.
A thubuai eng emaw zatah thiam loh chantir ni tawhin tang tura hremna pek a ni zel a, Nilaini khan eiruk thubuai pahnihah thiam loh chantir lehin, kum thum tang tura tih a ni. A hmaa hremna an lo pek tawhte nen a tan hun tur hi kum 26 a tling tawh.
Sipai court-in Suu Kyi-i thiam loh a chantirna hrang hrangte chu - dan loa ram pawn aṭanga walkie-talkie lalut leh kawl zui, coronavirus khuahkhirhna siam bawhchhia, official secrets act bawhchhia, sorkar laka hel, inthlana dik lo taka thilti leh, eirua puhna dangte a ni. Suu Kyi-i'n an puhna hrang hrangte hi thu dik lo vek niin a sawi a, amah thlawptute pawhin inthlanpui an neih leh turah a chuh theih lohna tura sipaiten hrekbeh an tumna niin an sawi bawk.