A hun hmain Japan inthlang

Japan chu nimin Pathiani khan an inthlang a, typhoon-in an ram a nuai avangin vote pawh a tlak ṭhat loh phah a ni.

Prime Minister Shinzo Abe-a'n thla khat kaltaa alo sawi lawk tawh angin inthlan hi buatsaih a ni, inthlan hun hi kumkhatin an sawn hma dawn a ni.

Inthlan hun ni Japan sana-a Pathianni zing dar 7 aṭanga khan ṭan a ni a, zan dar 8-ah khar leh a ni. Thlipui typhoon chuan nimin chawhnu lam khan Japan hi a nuai a, vote thlak tura pawn chhuak ngam lo mi eng emaw zat an awm nia tarlan a ni.

Eptu lam an chak loh lai tak leh an inhlawm ṭhat loh lai takin Prime Minister hian election hi a buatsaih nia tarlan a ni. Beisei anga Abe hi a tling leh a nih chuan indopui pahnihna hnu lama Japan rama thuneihna chang rei ber a ni dawn a ni.

Abe chuan vote hmun thuma ṭhena hmun hnih hmuh an inbeisei thu a lo sawi tawh a, hemi a nih chuan an ram dan a thlak thei dawn a ni. An ram dan hi a thlak thei a nih chuan Japan self-Defence Force-te chu National Army-a thlak a duh nia sawi a ni. Hei hi a thleng a nih chuan Indopuipahnihna hnuaa a thlen vawikhatna tur a ni dawn bawk.

PM Abe chuan September 25 khan inthlan buatsaih a nih tur thu hi hi a lo puang tawh a, an ramin harsatna hrang hrang a tawn mek sutkian nan inthlan vat hi a ṭul niin a sawi.

Heng buaina an tawh zingah hian North Korea-in an ram chung zawna missile vawi hnih lai an test tawh te leh, Japan ram tuipuia tihpil veka a vauna te a tel a ni. Fukushima nuclear policy leh chhiah chungchang te pawh a tel thu tarlan a ni bawk.