Russia sipai training ground beihnaah mi 11 an thi
Russia military training ground chu kar liamta Inrinni khan silai keng mi pahnihten beiin, mi 11 an that a, mi dang 15 in hliam an tuar tih Russia defence ministry chuan a sawi. He inkahna hi Belgorod region-a live-fire training exercise an neih laia thleng a ni.
Russia Defence Ministry chuan mi pahnihin Russia khawthlang rama volunteer sipaiten target practice session an neih lai chu va kal chilhin, mi 11 an thah hnuah an pahnih hian kahhlum an ni zui niin a sawi. He inbeihnaah hian mi 15 in hliam an tuar bawk a ni. Ministry chuan he thil thleng hi firfiaka chetna niin a tarlang.
"Ukraine lakah special military operation kan neih mek atana volunteer-ten firearms training session an neih laiin firfiakte chuan sipaite lakah silai hi an rawn hmetpuak a ni," tiin defense ministry thuchhuah chuan a sawi.
Ministry chuan silai keng mi pahnihte hi Soviet republic ram hlui a mi an nih thu sawiin a hmunah kahhlum nghal an ni, a ti. Tun hnaia Ukraine nena an indonaah an chet ṭhat loh chho mek karah hetiang thil thleng hi Russia president Vladimir Putin tan chuan thu hriat nuam lo tak tur a ni.
President Putin-a'n Ukraine bei tura sipai tam zawk lakbelh tura thupek a tihchhuah avangin rampumah thinurna a chawk tho a, Russia sipai sang chuangin indonaah hian tel an tum loh thu an sawi.
Ukraine sipaiten an ram chhim lamah beihpui an thlak thar mek avangin Russia chuan kar sarih chhungin ram tam tak a hloh tawh a ni. Putin chuan kar liam ta Zirtawpni khan reservist 3,00,000 koh tura ruahman aṭangin 2,22,000 chuang tirh an ni tawh tih a sawi. He hmalakna hi kar hnih chhunga zawh fel hman a tiam a ni.