Iran tan-inah kangmei chhuak

Iran khawpui, Tehran-a Evin tan-inah Inrinni zan khan kangmei nasa tak a chhuak a, tang zinga pali an thi a, mi dang 61 in hliam an tuar.

Tang zinga pali hi meikhu an hip luh nasat avangin an thi a, hliam zinga 51 chu pawn lamah enkawl nghal an ni tih official state news agency, IRNA chuan a sawi.

Iran rama hijab hmang ṭha loa puh police-tena an man, kum 22 mi Mahsa Amini thih chungchangah lungawi lohna lantir chhunzawm zel a la ni a, ram pum huapa nawrh huaihawt laiin tan-inah hian kangmei hi a chhuak a ni a, nawrh huaihawt nen hian inzawmna a nei em tih erawh hriatchian a ni lo.

Kangmei hi an ram huna Inrinni zan dar 10 vela chhuak a ni a, tan-in chhunga unit hrang hrangah a kangkai a ni. Thuneitute chuan tang zinga ṭhenkhat intihbuaina a thlen hnuah kangmei hi a chhuak niin an sawi a, mahse buaina chhuak hi vengtu lamin an thunun nghal tih an tarlang bawk.

Evin tan-in hi politics kaihhnawiha mante an dahna niin, journalist leh ram dang mi an mante dahna atan an hmang bawk.

Tun hnaia Mahsa Amini thihdana lungawi lohna lantira nawrh huaihawt man zinga eng emaw zat dah an ni bawk a ni.