China-ah President Xi Jinping duh lohna thuziak tar

China rama rorellai, Chinese Communist Party (CCP) Congress chu nimin aṭang khan neih ṭan a ni a, hetih lai hian China rama thil thleng khat tak, an ram President Xi Jinping duh lohna thuziak chu Beijing khawpuiah tar a ni.

CCP Congress hi kum nga dana neih niin, tun ṭum meeting-ah hian President Xi hi a term thumna turin hruaitu atan thlan chhunzawm a nih rin a ni.

Beijing khawpuiah hian mi ṭhenkhatin President Xi laka lungawi lohna lantirin, an rama Covid-19 kaihhruaina khauh tak siam an duh lohna thuziakte an tar a ni. Mahse heng thilte hi Chinese social media-te chuan an block nghal vek a ni.

Banner tar ṭhenkhatah dictator leh phatsantu Xi Jinping an duh tawh lo tih thute an ziak a, a ṭhenah chuan Covid-19 khuahkhirhna siam sawiselin, "PCR test ni loin ei tur kan duh. Lockdown ni loin zalenna kan duh. Dawt thu ni loin inzahtawn kan duh. Cultural Revolution ni loin insiamṭhatna kan duh. Sal ni loin citizen nih kan duh," tih thu an ziak.

Heng banner-te hi lakbo ni leh thuaiin an tarna bulahte police an duty nghal a, mahse international outlet - Bloomberg, Reuters leh Wall Street Journal-te chuan an tichhuak a, BBC news website-ah pawh tarlan a ni bawk.