Japan-ah sorkar lai an tling nawn

Japan rama ruling party Liberal Democratic Party (LDP) leh an thawhpui Komeito Party-te chuan Pathianni a lower house election neih zawh takah khan hnehna an chan thu Japan ram broadcaster lar NHK chuan a tarlang. Prime Minister Shinzo Abe leh a pawlte hian an beisei ang ngeiin vote hmun thuma ṭhena hmun hnih hmu in hnehna hi an chang a ni.

LDP hian lower house a seat awm 465 zinga 283 la in hnehna an chang a, Komeito Pary hian seat 29-ah hnehna changin seat 10 la bang vote la chhiar zawh anih loh avangin tute nge la dawn tih a la hriat loh a ni.

Vote hmun thuma ṭhena hmun hnih an lak takah chuan Japan Prime Minister leh LDP President ni bawk Shinzo Abe hian hun rei tak aṭang tawha a lo tum sa tawh angin an ram dan a tihdanglam ngei a rinawm.

Shinzo Abe chuan,"He hnehna hi ingaitlawm taka pawm ka duh a ni", tiin an ram danpui ennawn a duh thu a sawi nghal bawk a ni.

Hetihlai hian Tokyo Governor Yuri­ko Koike kaihruai Party of Hope leh Constitutional Democratic Party of Japan (CDPJ)-te chu eptu pawl lian ber niin anni hian Abe a kaihhruai sorak in chhiah chungchanga an ngaihdan leh an economic policy chu an sawisel nasa hle thung a ni.

Prime Minister hlui Yoshihiko Noda chuan eptu pawl te chu Ape-a hming­chhiatna ṭhenkhat avanga tun aia seat tam zawka hnehna chang thei an nih thu leh an kehdarh avanga ruling lamin seat heti zat la an nih thu a sawi ve bawk.

Vote hi chhiar zawh la ni lo mahse 2014 election ai kha chuan a tlak ṭhat an beisei a, kumin hian 53.60% vel tal vote a tlak an beisei a ni.

Hetih mek lai hian Japan ram hmun ṭhenkhat chu thlipui na takin a nuai ve bawk avangin vote thlak tum ṭhen­khat te hian buaina an tawk deuh a, mahse mi nuai 21 velin vote hi an thlak hmana ngaih a ni. Typhoon vang hian municipality ṭhenkhatah vote hi an la chhiar theilo a, Thawṭanniah chhiar zawh hman an in beisei a ni.