Spain-in Catalonia Madrid thutlukna pawm turin ti

Spain sorkar chuan Catalan chu Madrid thutlukna pawm turin leh inlak hranna kawnga hmala tute chu bang turin an ti.

Spain foreign minister Alfonso Dastis chuan Pathianni kha thuchhuah siamin Catalan chu Madrid in an hruaitute a banna chu pawm mai turin a ti. Buaina hrang hrang thleng mek sutkian nan foreign minister chuan Catalonia chu Madrid thuchhuak chu pawm turin a ti.

Catalan President Charles Puigdemont chuan Madrid thutlukna chu a pawm duh lo a, Catalan parliament speaker Carme Forcadell pawhin Madrid thutlukna chu a pawm dawn loh thu sawiin Spain Prime Minister Mariano Rajoy chu sorkar dinglai phiarru a paihthlatuah a puh. Inrinni khan independence duhtu mi tamtakin Barcelona-ah kawng an zawh bawk.

Spain foreign minister chuan sorkar in a tum ber chu dan kenkawh a ram danpui humhim a ni a, Catalan dan leh hrai pawh Madrid aṭanga kenkawh mai an tum thu a sawi. Catalonia-ah an dan leh hrai kengkawhtu tur hruaitu siam an tum thu leh hemi duhlo a ruahmanna siam tum an awm a nih pawn dan hmanga theihna an neih theih loh thu a sawi bawk a ni.

Dastis chuan Catalonia region a buaina awm chu ziawm lam pan turin a duh hle a, Catalan hruaitute pawh tuman an man loh tur thu a sawi bawk. Hetih lai hian inlak hran tumna kawnga an hruaitu pahnih erawh thu zawhfiah tur an neih avangin Court-in ala hren thu a sawi bawk.

Catalan lam thuneitute erawh chuan Spain sorkarin Madrid aṭanga tlang taka thuneihna lekkhawh a tum chu an pawm loh tur thu an chhuah a, anmahni leh anmahni thlawp tu te chuan Spain sorkar chu an office aṭanga paihthlak pawh an pawisak loh thu an sawi ve bawk.

Zirtawpni khan Spain Prime Minister Mariano Rajoy chuan an ram danpui article 155-na hmanga Catalonia a sorkar lai chu paihthlaka Madrid aṭanga mahnia thuneihna kenkawh anih tur thu a lo sawi tawh a, nakum January-ah inthlan ṭhat a nih tur thu te pawh a lo sawi tawh bawk a ni. Hei hi Catalonia hruiaitute chuan duh lo in an dodal nasa hle.