Russia-in Kamikaze drone hmangin Ukraine khawpui a kap

Russia chuan nimin zing khan Ukraine khawpui, Kyiv chu 'kamikaze drone' hmangin a kap leh niin Ukraine presi­dent chief of staff Andriy Yermak chuan a sawi.

Russia in a beihna avang hian an ram huna zing dar 6.35 velah Kyiv khawpuiah hian siren tihrik a ni a, a hnuah ram chhung hmun dangah pawh siren hi tihrik zui a ni.

Andriy Yermak chuan Russia chuan he thil hian an beihpui thlak meknaah a pui dawn niin an ngai a, mahse an mangan tawhzia tilangtu zawk a ni, a ti. Russia-in boruak aṭanga a beihna lo dang tura air defence system tam zawk a rang thei anga an mamawh thu a sawi nghal bawk.

Kyiv mayor Vitali Klitschko chuan drone hian central Shevchenkivsky district-a building eng emaw zat kap fuhin, kangmei a chhuak zui tih a sawi a, he biala chengte chu inhumhimna hmun pan turin a chah. Russia beihna avanga thi zat leh hliam awm zat hi an la hriatchian theih loh thu a sawi bawk a ni.

Ukraine president Volody­myr Zelenskyy chuan an ram khawpui hrang hranga energy infrastructure beihna atan Russia hian Iran siam drone an hmang niin a sawi a, mahse Iran chuan indona atana hman tur ralthuamte Russia a supply lo tih a sawi thung.

October 10 khan Russia hian missile hmangin Kyiv leh khawpui lian dangte chu vawi tam tak a lo kap tawh bawk a, hemi ṭuma an inbeihnaah hian mi 19 an thi a, mi dang 105 velin hliam an tuar a ni. October 11 khan Ukraine khawthlang lama energy infrastructure-te a kap leh bawk. Russia president Vladimir Putin chuan Russia-in a awp, Crimea bial leh Russia inkalpawhna awmchhun lei pawimawh tak a kahchhiat avanga an chhan letna niin a sawi.

EU-in Ukraine sipai 15,000 training pe dawn
European Union chuan Ukraine sipai 15,000 te chu thla leh aṭangin training a pe dawn a, Ukraine tan ralthuam euro maktaduai 500 hu pek belh a remti bawk. Hemi nen hian EU-in Ukraine tana ralthuam a pek hi euro tluklehdingawn thum chuang a tling tawh dawn a ni.

EU senior official pahnih chuan military training hi November thla laihawlah Poland leh Germany-ah neih a ni dawn niin an sawi. EU ram ṭhenkhatte hian Ukraine sipaite chu ralthuam ṭhenkhat hman dante an lo zirtir tawh a ni.