Pakistan by-election neihna seat 8 zinga 6-ah Imran Khan a chak

Pakistan prime minister hlui, Imran Khan chu Pathian­nia by-election neihna seat pariat zingah parukah a chak.

Imran Khan hian by-election neihah hian seat pasarihah a chuh a, parukah chakin, a bak pahnihah hian ṭangrual sorkara tel, Pakistan Peoples Party chu a chak thung.

Seat parukah chak mah se, seat pakhat chauh a luah zui theih avangin Imran Khan hian a chakna seat dang panga aṭangin a ban a ngai leh dawn tho a, hengah hian inthlan hi neih ṭhat leh a ni ang.

Kumin April thlaa no-confidence vote hmanga Prime Minister a nihna aṭanga paihthlak, Imran Khan hian an ram inthlanpui a hma thei anga buatsaih phutin ram chhung hmun hrang hrangah rally a nei a, thlawptu pawh a ngah thei hle.

Hetih lai hian Election Commission chuan Imran Khan-a party, Pakistan Tehreek-e- Insaf (PTI) chu dan loa US, Australia leh UAE aṭanga foreign fund dawngah a puh a, mahse PTI chuan hei hi thu dik lo niin a sawi a, court-ah a appeal mek a ni.

Supreme Court-in PTI appeal-na hi a pawm loh chuan, an party hi inthlana chuh thei lo tura hrem theih an ni ang. Hei bakah investigative agency chuan Khan hi an party account hmangin Dubai-a hmunpui nei, Abraaj Group founder Arif Naqvi hnen aṭanga dan loa sum dawngah a puh bawk a ni.

He thubuaiah hian thiam loh chantir a nih chuan Khan hi kum nga chhung politics a khelh khapsak a ni dawn bawk a ni.