ASEAN Defence Minister-te'n Terrorist do let kawngah thawhho remti

Association of Southeast Asian Nations (ASEAN) hnuaia ram hrang hrang Defence Minister-te chuan Joint declaration on the ASEAN Defence Minsiter's Meeting (ADMM), Phillipines-ah an nei a, terrorist do etna kawngah thawhho an remti. Helte do letna kawngah chak zawka hmalak an remti bawk.

ASEAN Defence Minister-te hian Islamic State (IS) firfiak-te'n Southeast Asia ram ṭhenkhata ram an lak belh zel chu nasa zawka do turin thutlukna an siam a, mahni ram ṭheuhah mipuite chu IS hmalakna hlauhawm zia uar zawka inzirtir nise an ti. ADMM-ah hian ASEAN minister-te hian thawhhona ṭha neih a ṭul zia an sawi uar hle a, chanchin inhrilh tawn kawngah leh, intelligence lam thleng pawha ṭhawhhona ṭha neih a ṭul thu an sawi. Mipuite zingah pawh terrorist-te hmalakna dolet tura inhrilh hriat tam a ṭul thu an sawi uar hle bawk.

Phillipines-ah hian Marawi khawpuiah sorkar leh IS firfiakte thla nga zet an inbeih tawh a, mi 1,200 laiin nunna an chan tawh a ni. Hemi chungchang hi sawi lan a ni a, Phillipines sorkar hmalakna an thlawp thu an sawi bawk.

Phillipines Defence Secretary Delfin Lorenzana chuan press conference-ah Marawi khua aṭanga terrorist an umbo tawh thu a sawi a, sorkar security force-te'n IS firfiakte tawmna buiding pawh an thenfai tawh thu a sawi bawk. IS thenfai hna an thawhna hnuhnung berah hian ruang 42 an hmuhchhuah thu a sawi bawk a ni.

Defence minister-te hian Korean Peninsula-a buaina awm chungchang pawh an sawilang a, tun hnaia North Korea-in nuclear leh ballistic missile test a neih chungchang pawh an sawi chhuak a ni. North Korea chu UN Security Council resolution pawm vat tura an duh thu an tarlang bawk.

Tuipuia sumdawnna leh security chungchang pawh sawiho niin South China Sea-ah remna leh muanna, venhimna ṭha zawk leh chak zawk a awm theihna tura hmalak an remti.

ASEAN minister ṭhukhawm hian ram hrang hrang awiawhte inbiakna hi, Asia leh Pacific-ahte venhimna ṭha zawk a awm theih nan kumtin neih nise tiin an rel bawk. ADMM-ah hian ASEAN bakah ram dang pariat - Australia, China, India, Japan, New Zealand, South Korea, Russia leh Unites States-te an tel a ni.

ADDM hi kumhnih danah neih ṭhian a ni a, tun ṭumah hian kumtin neih tura rel a ni. ADMM hi vawi 11 neih a ni tawh a, Phillipines hian a thleng a ni. ADMM hi kum 2006 khan din niin ASEAN defence lama thuneitu ber an ni.