Trump-a'n nasa zawka North Korea hrek duh

White House official pakhat chuan U.S Pre­sident Donalh Trump chuan November thlaa China a tlawh hunah, Chian President Xi Jinping chu an insumdawn tawnna kawngah North Korea chu nasa zawka hrek tura a ngen tur thu a sawi.

U.S President chuan China President chu UN Security Council-in Pyongyang chungchanga resolution a siam chu a vaia bawhzui turin leh, North Korea chu nasa zawka hrek turin a ngen dawn a ni, a ti. China leh North Korea hian insumdawn tawnna hi a lian hle a, NKorea-in insumdawnna kawnga a thawhpui lian ber (90%) a ni.

Chian chuan UN Secu­rity Council Resolution-in NKorea hrekna tur a siam hi na taka a kalpui tur thu a lo sawi tawh a, coal, textile leh seafood lama an insumdawn tawnna titawp tura tih a ni. NKorea hi tuialhthei an thawhluh pawh hreksak an ni. China-in an thutlukna anga hma an lak hun an nghahhleh thu US official chuan a sawi bawk a, UN Security Council resolution chu a taka a kalpui hun hmuh an nghahleh thu a sawi.

North Korea-in nuclear leh missile a test fo avang hian China hi lungawi lo viau mah se, China hian North Korea-in hetiang thil a tihchhanah hian US leh South Korea-te chuan mawh an phur ve bawk niin a ngai.

US leh South Korea-te chuan military drill an fo a, heihi North Korea chuan duh loin, beih an tawh thut theihna laka an himna tur leh vaulet nana a inlulingah ngaih a ni.