Australia-in Israel khawpuia Jerusalem a pawmna a sût
Australia sorkar chuan kum 2018-a an ram prime minister hlui, Scott Morrison kaihhruai sorkarin Israel ram khawpui atana West Jerusalem a pawmna chu a sut leh tih a sawi.
Foreign minister Penny Wong chuan hemi chungchangah hian thuchhuah siamin, Jerusalem status chu Israel leh Palestinian mipuiten inremna siam tura inbiakna an neihah an chinfel tur a ni tiin, sorkar hmasa thutlukna lo siam tawh chu sut a nih thu a sawi a ni.
Wong chuan Australia embassy pawh Tel Aviv-ah dah chhunzawm zel a ni dawn tih sawiin, Israel leh Palestinian ram pahnih din chu Australia chuan a duh a ni, a ti. Hemi tihhlawhtlinna tura hmalakna chu an thlawp zel tur thu a sawi bawk.
Israel leh Palestinian-te inremna siam tuma hma an laknaah Jerusalem chungchang hi buaipui ngai tak pakhat a ni. Israel chuan Jerusalem khawpui pum, khawchhak lam pawh huam tel vekin, a ram khawpuiah a ngai. Hetih lai hian Palestinian lam chuan Palestinian ram a din hnuah Israel-in a luahsak mek, East Jerusalem chu an ram khawpui turin an ti thung.
Israel prime minister Yair Lapid chuan Australia sorkar thutlukna siam chu a sawisel nghal a, thutlukna an siam hma lutuk nia sawiin, "Thil dang chu Australia sorkar hian ngunthluk taka a ngaihtuah tawh kan beisei," a ti.
"Jerusalem chu Israel khawpui a ni a, a ni chhunzawm zel dawn a, engmahin a thlak danglam lo ang," tiin Israel PM office thuchhuah chuan a tarlang.
Israel foreign ministry pawhin an rama Australian ambassador koin, an lungawi lohna thu pawh an thlen tawh bawk.
Hetih lai hian Palestinian lam chuan Australia sorkar thiltih chu an fak thung a, Palestinian Authority civil affairs minister, Hussein al-Sheikh chuan, "Jerusalem chungchangah Australia thutlukna siam leh, two-state solution siam ngei a duh thu a sawi chu lawmawm kan ti hle a ni,"a ti.
US President hlui, Donald Trump-a'n Jerusalem chu Israel khawpuiah pawm a, Tel Aviv aṭanga US embassy a sawn hnuah khan Australia PM hlui Morrison pawhin Jerusalem hi Israel khawpuia an pawm thu a puang zui ve a ni.